Aurreko batean aspaldiko partez nire bi lagun minekin bazkaltzeko elkartu nintzen. Ez dakit zuri ere gertatzen ari zaizun baina berrogeialdiaren ondoren eta komunikabideetan etengabe kutsaduraren nondik norakoa besterik entzuten ez den momentu honetan, niri izugarri kostatzen ari zait sozializatzea.
Nire kasuan ez dut uste kutsatu edo kutsatua izateari beldurra denik arazoa. Esango nuke gehiago dela, une edo pertsona bakoitzarekin nola jokatu edo harremandu ez dakidanez etxean erosoago sentitzen naizela. Baina horren ondorio zuzena (hau koronabirusa baino lehen ere detektatuta nuen) pixkanaka-pixkanaka apaltzen noala da, itzaltzen, bizi-energiarik gabe geldituko banintza bezala.
Zurekin partekatzen dut gertaera hau, beharbada zuk ere sozializatzeko zailtasunak dituzula senti dezakezulako, eta agian nire antzera, itzaltzen ari zarela ohartu zarelako.
Kontua da, bi lagun hauekin azken hilabeteetako energia falta hura elkarbanatzeak izugarri lagundu zidala. Zeren aitortu behar dut, itzalita sentitze horren atzean bestelako ondorioak ere egon dira, batere harro sentiarazten ez nauten ondorioak.
PROKASTINAZIOAREN ITURRIA
Besteak beste, niretzat benetan garrantzitsuak diren egitekoak alboratutak nituen. Nire bizi-proiektua, Kokoro Tailerrarekin martxan jartzea izugarri kostatzen ari zitzaidan. Horren ordez, nire denbora preziatua dudan bizio handienean gastatzen ari nintzen: pelikulen eta telesailen yonki bat naiz. Behin hasiz gero, ez dut mugarik.
Tontakeria bat dirudi baina niri izugarrizko lotsa ematen dit horrelako zerbait ezagutzen ez dudan jendearen aurrean onartzeak. Izan ere, horrek nire ospe ona, edo niretaz izan dezakezuen irudia, edo neska formal-organizatu-arduratsuaren irudia “zikindu” dezake erabat. Baina zer egingo zaio ba, hori ere ni naiz, ez gehiago ez gutxiago.
Gaur egun oso modan dago “procrastinar” hitza. Ekintzailea bazara, ziur azkeneko bi urteetan toki guztietan entzuten ariko zarela. Bada, bazkarian zehar jokaera honen inguruan hizketan aritu ginen, nola energia baju dudanean prokastinatzeko joera izugarria dudan. Eta beraiekin hizketan ohartu nintzen, nire kasuan behintzat, joera honen atzean ez dagoela alperkeria edo utzikeria, muturreko perfekzionismoa baizik!
PERFEKZIONISMOAREN BESTE ALDEA
Perfekzionismoa bi ahoko ezpata dela esango nuke. Perfekzionismoak izen ona du, oso ongi gelditzen da lan elkarrizketetan zure ezaugarriak izendatu behar dituzunean baita proiektu bat aurrera atera behar duzunean ere. Baina gutxitan aipatzen da (geroz eta gehiago, eskerrak!) horren atzean dagoen sufrimendu guztia.
Oso gutxitan kontzatzen da nola guztia perfektu egiteko beharragatik erabat blokeatuta gelditu zaitezkeen. Horrek zure burua zigortu eta autoexigentzia handitzera zarama. Eta exijentzia horiek ezin betetzeak oraindik gehiago sufriarazi, blokeatu eta prokastinaziora bultzatzen zaituen min hori gutxitu edo anestesiatzeko azken irtenbide gisa.
“Hobe eginda perfektu baino” errepikatzen diot nire buruari mantra baten moduan. Baina esan behar dizut, esaldia behin eta berriro errepikatzeak niri behintzat ez dit ezertarako balio, tartean beste lanketa edo irtenbide batzuk jorratzen ez baditut behintzat.
PERFEKZIONISMOA ORDENEAN
Baina zer zerikusi du honek guztiak ordenarekin?
Badauka bai. Zein uste duzu dela KonMari metodora hurbiltzen direnen artean gehien ikusten dudan ezaugarria? Asmatu duzu bai, muturreko perfekzionismoa! Zure burua esaldi hauetakoren batekin identifikatzen duzu?
– Ez nago etxean gustora gauzak gordetzeko ditudan espazioak ez direlako egokiak
– Nire etxeari estiloa falta zaio. Inspirazio iturriak bilatu eta osagarri politak jartzen dizkiodan arren ez dut nire sentitzen.
– Ondasun bakoitzari bere tokia falta zaio, denetik topa daiteke edozein txokotan.
– Etxeko banaketa ez dela egokia uste dut, nire bizitza erraztu baino zaildu egiten du.
– Etxera sartzen naizenean larrimina edo ezinegona sartzen zait.
– Zintzilik ditudan kontu gehiegi ditut, itxi beharko nituzkeen gai gehiegi, ordenatu eta klasifikatzeko gauza gehiegi. Hori egitea lortzen dudanean hasiko naiz etxea sakonki antolatzen.
– Egin beharreko lana handiegia, sakonegia, konplikatuegia iruditzen zait, beraz, une egokiago baterako utziko dut.
Horietako batekin edo gehiagorekin egin duzu bat? Ez dakit ohartu zaren baina baieztapen horiek guztiek etxe baten lanketarekin zerikusia duten azken pausuei egiten diote erreferentzia. Hau da, etxearen itxurari edo eduki behar dituen biltegiratzen sistemei buruz ari dira.
Baina nola jakingo duzu zure etxeak zein estilo izan behar duen, zein kolore, ehun edo material erabili behar duzun edota zenbat armairu behar dituzun aurretik zure benetako beharrak ezagutu gabe?
Nola erabakiko duzu hori guztia, benetan zenbat gauza dituzun eta horietatik zenbat behar edo nahi dituzun ez badakizu?
Nola eraikiko duzu zure ametsetako etxea aurretik zer duzun, zer nahi duzun edo nor zaren ez badakizu?
Etxea teilatutik eraikitzea bezala izango litzake. Hori da hain zuzen perfekzionistok dugun arazoetako bat.
Perfekzionistek beren buruan haien etxeak zein itxura izan beharko lukeen argi ikusten dute. Beren etxearen argazki ideala erraz ikusten dute. Beharbada, ez dituzu argi zehaztasun guztiak, baina bai irudi orokor bat, ezta?
Argi duzu amaierako emaitza baina ez dakizu zein pausu eman behar dituzun horra iristeko. Gainera, pausuak ematen hasi orduko oraindik larrituago sentitzen zara, guztia hasieran baino nahaspilatuago dagoelaelako edo inoiz amaituko ez den lana dirudielako.
PERFEKZIONISMOTIK ERREALITATERA
Hortik nola atera kontatuko dizut pausuz pausu:
1// Zure bizitza ideala imajinatzea lagungarria izango da zein bizitza mota nahi duzun jakiteko. Ariketa honen bitartez zure lehentasunak, pasioak eta nahiak zeintzuk diren atzemango duzu.
Horrekin batera, irudikatu dituzun irudi horien atzean zein behar dagoen ikertzera animatzen zaitut.
2// Hausnartu zure espazioen inguruan. Zenbat espazio behar duzu? Galdetu zeure buruari zergatik eta zertarako behar/nahi dituzun espazio horiek. Izan kontutan, halaber, espazio pertsonal eta komunen artean oreka egon behar duela. Zu zeu baldintzarik gabe zaren bezelakoa izateko guneak behar dituzu.
3// Zure ondasunetatik hasi. Badakit batzuetan errazagoa dela besteen gauzetatik hastea, baina nekez helarazi ahalko diezu gainontzekoei etxea ordenatuta eta txukun izatearen garrantzia aurretik zuk barneratu ez baduzu.
4// Kategoriaka ordenatu, gelaka edo espazioka ordenatzen hasten bazara ez duzu inoiz amaituko. Gainera kategoriaka ordenatzeak etxetik kanpo dituzun gainontzeko objetuak (trastelekuan, garajean, oporretako etxean dituzu ondasunak) kolpetik ordenatzeko aukera emango dizu.
Gogoratu! Kategoriak: arropa, liburuak, paperak, komono (bestelakoak) eta objetu sentimentalak dira. Kategoria bat antolatzen hasten zarenean kategoria horretako objetu guztiak bildu (etxetik kanpo daudenak ere), banaka berrikusi eta zoriontsu egiten zaituztenak aukeratu behar dituzu.
5// Zerk egiten zaitu zoriontsu? Zoriontsu bere zentzu zabal eta sakonenean, noski! Beharbada ez duzu berehala jakingo galdera honen erantzuna, baina objetuak berrikusten zoazen heinean pixkanaka definitzen joango zara. Horretarako, zure erreferentzia bai ala bai bihotza pozten dizuten objetuak izango dira. Hasi horietatik eta utzi kategoriaren amaierarako zalantza sortzen dizutenak
6// Behin benetan zer behar duzun eta zerk egiten zaituen zoriontsu erabaki duzunean objetu bakoitzari bere tokia emateko momentua izango da. Jolastu, probatu, egin eta desegin behar beste aldiz. Eman zeure buruari esperimentatu eta benetan zerk eta nola funtzionatzen duen jakiteko denbora nahikoa. Ez dago presarik.
Hori guztia egiten duzunean bai, etxearen estiloari buruz hausnartzeko momentua izango da. Ziur nago honaino iritsi bazarela askoz argiago izango duzula bene-benetan zer eduki nahi duzun etxean eta nola gorde nahi duzun.
Ezer baino lehen KonMari prozesua burutzeak gainera izugarrizko, dirutza aurrezten lagunduko dizu, alferrikako erosketak (dekorazioa, gordetzeko sistemak…) eta inbertsioak (dekoratzaile bati deitzea, esaterako) behar baino lehen egitea ekidingo baituzu.
Zer diozu? KonMari prozesuaren lehen pausuekin hasteko prest zaude? Kontaidazu zer behar duzun eta ahal dudan guztian laguntzen saiatuko naiz**
Artikulu hau interesgarria eta inspiratzailea iruditu izana espero dut. Horrela bada, interesa dakoikeen edonori zabaltzea eskertuko nizuke
Artikulu hau interesgarria eta inspiratzailea iruditu izana espero dut. Horrela bada, interesa dakoikeen edonori zabaltzea eskertuko nizuke 
Lagun baten bidez iritsi bazara hona, newsletterrean izen ematera animatzen zaitut, horrela, informazio zuzenean zure postan jaso eta eskura izango duzu
Eta noski, zerbait komentatu edo iradokizunik egin nahi baduzu, azpiko iruzkinetan idatzi edo email bidali iezadakezu. Plazera izango da zure iritziak, beharrak eta bizipenak ezagutzea
